نبي موقف

نبي موقف

يمنع جروحنا تنزف

نبي موقف

مايخلي الوطن

دمعاته تذرف

نبي موقف

،،،،،

نبي للرئيس مواقف رجوليه

مايهاب أحد  موليّه

ماتهمه مصلحة شركاته

ولايحب تنترس مخباته

نبي رئيس يشرّف

نبي موقف

،،،،،،

من متى صارت الرئاسه تفشّل؟

الكل فيك يابوصباح متأمّل

واللي يسلمك أحسن الإختيار

وإرحم عيال وطن النهار

لايوصل للرئاسه

اللي يبُخ ويسلّف

نبي موقف

،،،،،،،

نبي شخص كفو يستلم المطرقه

ترى ارواحنا بإختيارك معلّقه

ترى الشعب سوّا اللي عليه

مانبي نقول حسافة وولّيه

ولانبي الريج ينشِف

نبي موقف

أورّيك فيه

إخذه وياك قلبي لو نويت البعاد

دامك بعيد عني شسوي فيه

كان معاك الفرح يكتبله ميلاد

كان معاك مرتاح شايف أمانيه

مافاد قلبٍ بحنايا ولهان مافاد

خلّه يمكن ببعادك تحن لراعيه

خلّه وياك قلبٍ ماعرف  العناد

قلبٍ على كيف كيفك تمشّيه

سو ماتبي بقلبي و إنسى البعاد

أوعدني ماتخلّيني وأنا أورّيك فيه

عليكم بالعافيه

الدنيا ماشيه

ناس تموت وتنولد

ناس تغيب ماتنفقد

ناس هايمه

وناس لاهيه

والدنيا ماشيه

،،،،،

ناس تزرع بقلوبنا تذكار

ناس وجودها بيناتنا عار

ناس مع الحق متوالمه

ناس على الطّل حالمه

ورايحه بداهيه

الدنيا ماشيه

،،،،،،

الدنيا ماهمها منو راح

ولامنو عن كرسيه إنزاح

عالم نكسيه بمفاهيمنا

عالم نسقيه غرابيلنا

وعليه بالعافيه

الدنيا ماشيه

،،،،،

كل إنسان له مدّه

والموت محد يردّه

عيش يومك بشوية عقل

وشوية جنون شوية ثقل

ونتيفة أحاسيس دافيه

الدنيا ماشيه

رسالة إلى العالم

شفتوا شكثر نحب الديره

شفتوا شكثر كلمتنا كبيره

شفتوا شلون عمينا عيون

وجدينا عيون ضريره

شفتوا شكثر نحب الديره

،،،،،،،،

إحنا شعب نتنفس ديمقراطيه

إحنا شعب إنتنشق حريه

إحنا شعب نمحي الإنتهازيه

بأرواحنا حب وبقلوبنا غيره

شفتوا شكثر نحب الديره

،،،،،،،،،

مو سهله ينضحك علينا

نصنع المستقبل بإيدينّا

إيه نعم كفينا ووفينا

وكتبنا بحب الوطن سيره

شقتوا شكثر نحب الديره

ورقة تصويت

ورقة تصويت

فيها ألف حسافه

ومليون ياليت

ورقة تصويت

بإيدك تبني مستقبل بلد

ترحم شايب وتكبِّر ولد

يفرح بقبره جابر وسعد

اذا صار صوتك للكويت

ورقة تصويت

كانت

كانت

 الكلمه بإحساس تنقال

كانت

 الدنيا فايضه بآمال

كانت

الطيبه تقود البشر

وانتعلم منها العِبَرْ

و اليوم

كل النفوس البريئه عانت

كانت

،،،،،،،

كانت بناسها فرحانه الديره 

كانت الأماني وايد كبيره

وتناثرت المحبه بكل صوب

والفرحه ماشالتها قلوب

اليوم حتى البسمه

إنهانت

كانت

،،،،،،

ليمتى والواقع أحداثه أليمه

ليمتى الصراخ والشتيمه

ليش نسينا مفهوم الأخوه

كل شي بناخذه بالقوه

والنيّات  شانت

وكانت

،،،،،

قلايد ذهب

على الهدب

تلقى تعب

و حرف ماانكتِب

ناطر صفحة عيونك

تهديني دروب بوحي

وتردلي بقايا روحي

وصوتي اللي إنسلب

على الهدب

تلقى تعب

،،،،،،

تصدّق!! كلمتي تعبت تنزف

تصدّق !!ماتعلّمت أعزِف

إلا وأوتار نبراتي مشدوده

 صرت أهذي بإنشوده

ماتعرف للأوزان طريج

تصدّق الكلمه تنشّف الرّيج

تصدّق مشكلتي إني

وايد أحَب

وعلى الهدب 

تلقى تعب

،،،،،،

والله وبالله مابغيت أتكلم

بغيت بصمت فيك أتحلّم

بس التعب غصبني

والله مو مني

إنت السبب

على الهدب

تلقى تعب

،،،،،،

شي موحش لو تكون شاعر

تحس بداخلك وحش كاسر

يفترس أحاسيسك ويهزمك

ماتلقى أحد يفهمك

تحس بنشوة إنتصار

وكل مافيك إنغَلب

وعلى الهدب

تلقى تعب

،،،،،

 ياأيامي إسمعيني

واسمعي صرخات حنيني

ماأبي إجابة أبي رحمه

أبي تقدرين مفاهيم الكلمه

اللي بصدري ماهي حروف

اللي بصدري 

قلايد ذهب

وتعب


30-4-2009الخميس