زهيرية الستلايت

فيه ناس داخل أذونهم ستلايتات

يتسمّعون طايحيله بالحش سلايتات

يتنقل الحجي أسرع من شبّة الليتات

عقولهم فاضيه وداخل نفوسهم ظَلمه

آه من جور الزمان وأه من ظلمه

الحقيقه من افعالهم إصرخت متظلمه

صارت الإشاعه كذبه تنقلها ستلايتات

الله يرحمهم

لنمد أيدينا لأهلنا في الجهراء للتبرع بالدم لكارثة الجهراء بأسرع وقت ممكن للمصابين حيث ان جميع فصائل الدم مطلوبة بكميات كبيرة

باب التبرع مفتوح من السابعة صباحا في بنك الدم والهلال الأحمر الى التاسعة مساءا في بنك الدم والعاشرة في الهلال الاحمر

كلنا أمل بدعمكم ومساهمتكم

........

ماتدرين

انتي تدرين

إني بأرض

طبيعتها جامده

نسماتها ماهي عليله

إنتي تدرين

إن السما علينا بخيله

وإن الورود جليله

ورغم كل هذا

بابقى أتغنّى فيج

.... بالنوّير

.... بالسدرة الحنينه

بشجره عطشانه ومرتويه

تدرين

أقدر أخلق من بساتين عيونج

دواوين

وإنتي تدرين

......

إنتي تدرين

ماشفت نهر جاري

عشان أشبّه فيه شوقي

تصدقين ماني داري

أبوصف نَبض  عروقي

.... وهيام

.... ولهفه

....وحنين

تدرين ؟؟؟؟

......

ماتدرين

إن معنى الهدوء أفقده

بس أعرف أحسّه وياج

ماتدرين بحبّج بدا

يسري من قلبي لي يمناج

وياعلج تحسّين

... ماتدرين

... ماتدرين

... ماتدرين

٣١-٧-٢٠٠٩

الجمعه

مقصله

بكل بقعه بالأرض مصيبه ومشكله

نزاعات ومظاهرات أمراض وحروب

العالم يشكي من ضيقة ومعضله

ناس تظلم ناس بذمه ولا تتوب

هل هذي النهاية فهموني المسأله

والا هذا مجرد تكفير ذنوب

فيه شي صاير لا لا فيه بلا

 معقوله الحق بكل مكان مسلوب؟

فايروس طيور  وأمراض كلى

ناس تنشل من إبره ومن حبوب

الفوضى صايره فوق ارقابنا مسلله

والخوف انزرع بالأرواح والقلوب

أزمة إقتصادية وعالم من همّه إمتلى

بسنا عاد نبي منطق و إسلوب

متى ألقى أنا حل حق هالمشكله

حقي من الهدوء بهالدنيا مسلوب

6-8-2009
الخميس

لا

 قالوا إنساه

وعوفه ؟؟

قلت : 

بس 

خلوني أشوفه

وأوعدكم أعوفه

و أنساه

......

قالوا تَصبِر على بعاده ؟؟

قلت : النيران وقّاده

تذوّب روحي بحشاي

والنار ماتبي ماي؟؟

الماي شوفته

إي والله

قالوا انساه

........

لو قالوا مليون لو

كل ماله بعيوني يحلو

أسئله إجاباتها بعيوني

ياناس خلّوني

أعيش مابقى ويّاه

وتالي أنساه

!!! أنساه

!!! أنساه

!!! أنساه

راحت سنين

راحت سنين

كبرَت الأشياء بعيوني

ويزيدون للي يبوني

ويمضي العمر بلحظه

تتراكم الأحداث بأفكاري

وأتعلّم من سوايا أقداري

أصير خال

أصير عَم

أصير أُبو

وأنا أدوّر اللي يعين

وراحت سنين

،،،،،،،،

واعي لك يازمن .... واعي

تكبّرني ويكبر فيني العمر

تتطبّع فيك كل أطباعي

وذكريات تروح وتمُر

والله يصبّرني على الياي

اللهم آمين

راحت سنين

٢٠-٧-٢٠٠٩

الأثنين

Mac book

فجأه عقدت العزم على المضي قدما لعالم الماك  وهو نظام يختلف تماما عن نظام الوندوز  وبصراحه صارلي فتره لم انجح في دخول هذا العالم الجديد ولم افهم شيئا بهذا الجهاز الغريب

 

ومن حر مافيني كتبت

هذي حاله ويّا هالماك

شسويّت بعمرك يابراك

تأذيت وتمرمرت

تعذّبت وتغربلت

تبي تتفنتق؟؟

عيل خذ جزاك

انت من صجك ماك

،،،،،،،

عابل بنفسك وإحتار

حتى عقلك من راسك طار

صار كل شي بالمنكوس

تحس داخل عقلك طوس

وتسمع صوت ليوه وراك

عاش راعي الماك

،،،،،،،

لاتقدر تنزلّك صوره

قاعد كإنك أبجوره

لافايده ولا عايده

مشكلتك وايد جايده

شمسوي بعمرك الله يهداك

انت وين ووين الماك

،،،،،،،،

تبي تطلع فيها ياشاطر

هذا إنت قاعد وساطر

ماتدري شاللي يحوس حواليك

ميوّد بيبسي وقاضب فليك

والبطاط يطالعك هناك

ٌإنت من صجك ماك

،،،،،،

قبل هبابه تبطّل الجهاز

اللحين للمساعده معتاز

تبي اللي يتفرغلك؟؟؟!!؟

تعوذ من ابليس أبركلك

نعّز الشاشه

وشوت البلاك

بلا تقدم بلا تجديد بلا ماك

يتفنتق : أي يخترع شيئا جديدا

عابل : أي واجه أو إعمل أو بالمصري إحترس نفسك

بالمنكوس : بالمقلوب

طوس : والمفرد طاسه وهي أحد الأواني المنزليه ويشرب بها الماء أو اللبن

ليوه : موسيقى شعبيه فيها لويه  

ساطر : أي جالس ينتظر

يحوس : يتحرك بإتجاهات متعدده

الفليك : شيكولاته

 هبابه : بالكاد

معتاز : محتاج

نعّز : بفتح النون وتشديد العين أي أبعد مثال : نعّز (أبعَد ) براك ابريق الشاي إيدي كده بوزي كده اصب الشاي وأرجع كده