سر في بير

شتغيّر فينا من يوم التحرير

وصلنا القمر وإلا داحرنا ألمانيا

صار الوطن هو بيتنا الكبير؟؟

وإلا الكل عاش بدنيا ثانيه؟؟

فيه غلط وفوضى وتقصير؟؟

وأصناف من الحسد ونماينه؟؟

قبل ١٩ سنه من الفرحه كنا نطير

واليوم ملامح الخوف باينه

لابنواب ولابحكومه بنستجير

هالبلد له رب حافظه وصاينه

كنوز من المعرفه بيوم التحرير

لاتعلمنا ولا داحرنا تنزانيا

٢٦-٢-٢٠٠٩

الخميس

الاحتباس الحراري

ناس تفكربالإحتباس الحراري

وضاع وقتها ببحوث وقراية كتب

ناس تحاول تطوّر قوانين للقواري

و ناس المناصب عليها تُخُب

و ناس مركبهم دوم سمّاري

احوالهم ريشه تطير وتطب

ناس إصنعوا لنا صاروخ واتاري

وإزرعوا العولمه طيب غصب

ناس تعالج العجز الإكتواري

وناس ان قالت لأ ممكن تنقضب

ناس طايحينله مربيَن عيش بخاري

وناس وقتها للبحوث وقراية الكتب

قطيرات غيوم

تعبت

من كثر ماأحبك

تعبت

أكتبك .. أغنيك .. أرسمك

أنسجك .. أتخيّلك.. أحلمك

ولاقدرت

تعبت

من كثر ماأحبك

تعبت

.....

براكين من الوله .. داخلي

مأدري شبقالي ..وشراحلي

ماأدري شجنيت

وشاخذت

تعبت

تعبت

....

الأشواق تأذي الروح

تعلّم النفس تنوح

وتخلق كلام ماأعبّر أقوله

لو كلمة أحبك تكفي

جان ألف مره أحبك

قلت

وتعبت

من كثر ماأحبك

تعبت

........

 حبك ... سكن حنايا روحي

انت أول ..... وآخر طموحي

مالقيت من أحبّه .. كثرك

أشوفك غيمه ... وأنا حدرك

وبقطيرات غيومك

ذِبت

وتعبت

تعبت

.....

ماتحس بما فيني ... لإنك مرتوي

من أصدق أحاسيس مشاعري

ماتحس بما فيني .. وقلبك قُوي

مادري من قواه ماادري

ومادري شبتسوي فيني

إنت

تعبت

من كثر ماأحبك

تعبت

يوز

يوز عني يوز

لاتقول وخّر

وإدن وراك

و إبعد

أو خوز

يوز عني يوز

.....

أسويك رغوه

أسويك حلوى

تبي مسقطيه لو محرقيّه

تبي مسويتها جيكره

وإلا عيوز

يوز عني يوز

.....

القمنده عندك القمنده

أنا على قد حالي بسيط

موعايش ببيت فيه برنده

كنت أحب أجمع النبابيط

كان كل شي فيني زين

اليوم ضرب الفيوز

يوز عني يوز

......

عشقي ماله حد للصبور

أحب صوت الجدور

لما إتراقع بالملاله

أحب ريحة البخور

من كسره صغيرونه

ريحتها غير نمونه

مثل ريحة بو عزوز

يوز عني يوز

......

ماعندي مواتر وسياكل

شارب نايم ماكل

أروح دوامي بإنتظام

أحترم كلمة دوام

وأسمع فيروز

يوز عني يوز

.....

مرات أروح سوق واجف

اشتري قحافي وجناجف

وميوه واستكانات وشراشف

وبطل فيمتو مرزوز

يوز عني يوز

.....

وايد أتحلطم بس مؤدب

احلم برحلة لباب المندب

او لروما وفنزويلا

وبتونس آكل باجلا

وبتركيا أمد البوز

يوز عني يوز

.....

ماأقز أبد كلّش خير شر

أقعد بالديره حتى لو حر

ماأتكلم بالتلفون وأسوق

ودمي دايما محروق

بس أطيب بالأفنيوز

يوز عني يوز

......

من أول واحد .. إثنين.. ثلاثه

لاهذا يرهن بيته

ولا يبيع ذاك أثاثه

كل موضوع بينحل

يابآب

يابحزيران

يابتموز

يوووووووووووز

١٥-٩-٢٠٠٩

الخميس

تمطر

تَمطِر

 الروح تمطر

مرتويه من حسك

تقطر

حروفك تقطر

على أطراف قلبي

وتلقى ندى

بارد

وبنسماتك متعطر

تمطر

تمطر

.....

 علي صدري رِسمت

رسمه تلاوينها إنت

كنت أصل تكوين روحي

كنت وكنت وكنت

بس خلاص ماأعبّر

أمطر

أمطر

١٩-٨-٢٠٠

الاربعاء

لاتمنع

لاتمنَع

وتخلي الناس

لعقليتك تخضع

لاتمنع

هذا إيه

وهذا عيب

وهذا وَعْ

لاتمنع

......

قبل لاتفرض قرارك إسمَع

شوف راي العاقل وإقنَع

شوف حالته نفسيته

شوف واقع ديرته

ومن وقتك الثمين

مره تبرّع

لاتمنع

......

هالمجتمع ثلثينه شباب

ناخذ الخبره من الشيّاب

ونخلق جسور من التواصل

مو مهم هذا رزه وذاك واصل

المهم الأمور

إتّسنّع

ويافهيم إسمع

لاتمنع

١٦-١٠-٢٠٠٩

الجمعه

ظلال

ظلال

تشكّلت أشابيها ...بأرض

وآمال

إنسجت حياة ونبض

وشمس تحرق اليابس والَخضَر

كل الناس تشوف فيها نور

كل الناس تحس بدفى

إلا أنا كل اللي أشوفه

خيال

وظلال

..........

لي إهتز الغصن

أسمعله .... أنَّه

واللريح صوت ... يخوِّف

وأغصب الورود تذبل

وهي مرتويه

اللي يصير ... شمنّه ؟؟

وليمتى على

هالحال

وظلال

....

الظل رسمه تشبه الأصل

....بس مالها ملامح

الظل سواد لصوره

.....تحتاج خيال جامح

يوصف اللحظه

وطُولت بال

وظلال

.....

لو كل من حَس نطق

وإستوعب المنظر

ولو الحرف غرق

بيوف الدفتر

وعلمني شلون

أحجي بلا كلافه

وأتعبّر

مايبقى شي أخافه

وإن قالوا الشعر بحر

أنا اليال

وظلال

.....

.....خلّتني أحزاني

أوزن الكلام

وأتنقَّى الكلمه

... وأذوبها بحشاي

......خلّتني أحزاني

أرسم بالهوى رسمه

تطير بسماي

مابقى عندي بعد

شي ينقال

ظلال

١٤-١٠-٢٠٠٩

الأربعاء